Sa pagbubukas ng bagong taong panuruan, pormal na isinagawa ng North Eastern Mindanao State University (NEMSU) Tandag Graduate School ang oryentasyon para sa kanilang mga mag-aaral kaninang umaga, Agosto 30, sa University Gymnasium.
Matapos magbigay ng pambungad na salita si Dr. Floresito D. Calub, ang OIC Campus Director, binigyang-diin ni Dr. Nemesio G. Loayon, SUC President III, sa kanyang mensahe ng inspirasyon ang kahalagahan ng pag-aaral upang hubugin ang husay sa kanilang propesyon.
"We understand the vital role of the graduate school on your professional achievements, but foremost, that is very vital for your work and profession," ani Pres. Loayon. Kasunod nito, ipinakilala ni Dr. Jennifer M. Montero, Dean ng Graduate School, ang mga tagapag-ugnay ng programa, mga guro, at kawani ng NEMSU Tandag Grad School. Kalauna'y naglahad din siya ng mga balita ukol sa mga operasyon nito.
Bukod doon, nagbahagi ang Vice President for Academic Affairs (VPAA) na si Dr. Maria Lady Sol A. Suazo ng mga akademikong impormasyon na may kaugnayan sa mga mag-aaral. Samantala, tinalakay naman ni Vice President for Research and Extension na si Dr. Rolly G. Salvaleon ang mga usapin hinggil sa pananaliksik ng Grad School. Habang nagpaalala ang University Registrar na si Ms. Lynnet A. Sarvida ukol sa mga dokumentong kailangang isumite upang maging maayos ang daloy ng kanilang pag-aaral.
Kasabay ng nasabing orientation program, nagsagawa rin ng eleksyon para sa mga bagong estudyanteng manunungkulan sa NEMSU Graduate School Student Organization, kung saan pormal na nahalal si G. Mark Jade G. Burlat bilang bagong pangulo.
Ayon sa datos na ipinakita ni Dr. Montero, umaabot sa 1,486 ang kabuuang bilang ng mga mag-aaral sa Grad School ngayong taong panuruan 2025-2026. Para sa mga karagdagang kuhang-larawan, maaring bisitahin ang Google drive na nakalagay sa post