𝐂𝐚𝐠𝐰𝐚𝐢𝐭 𝐒𝐮𝐫𝐢𝐠𝐚𝐨 𝐝𝐞𝐥 𝐒𝐮𝐫 - Sa temang “Buwan ng ASEAN: Sama-sama sa Pag-unlad,” ginanap ng North Eastern Mindanao State University (NEMSU) – Cagwait Campus ang ASEAN Day 2025 sa 3-Storey Academic Building.

Nagsimula ang selebrasyon sa isang maikling programa na sinundan ng makulay na parada ng mga estudyante at guro na may dalang flaglets ng sampung bansang kasapi ng ASEAN bilang sagisag ng pagkakaisa at pagtutulungan. Nagbigay ng pambungad na mensahe si Dr. Joezer S. Azon, Assistant Campus Director, kung saan kanyang binigyang-diin ang kahalagahan ng pagkakaisa, pagpapahalaga sa kultura, at aktibong partisipasyon ng mga estudyante sa pagdiriwang ng ASEAN Day.

Isa sa mga tampok na bahagi ng programa ang Best ASEAN Costume Competition, kung saan nagbihis ang bawat departamento sa tradisyonal na kasuotan ng bansang kanilang kinatawan. Matapos nito, nagpakitang-gilas ang bawat taon at departamento sa kanilang mga cheer at yell na nagpasigla sa buong venue. Bago ang pagsisimula ng iba pang kompetisyon, nagbigay ng inspirasyonal na mensahe si Dr. Rozette E. Mercado, OIC-Campus Director, na muling nagpaalala sa kahalagahan ng pagkakaisa, aktibong partisipasyon, at pagpapahalaga sa kultura at kasaysayan ng ASEAN.

Pagkatapos ng masiglang paligsahan, idineklara ang mga nagwagi sa Best ASEAN Costume, na nagbigay ng dagdag na inspirasyon at sigla sa mga kalahok. Sumunod dito ang iba’t ibang kompetisyon gaya ng mural painting, debate, at quiz bowl. Bilang pagtatapos ng selebrasyon, nagbigay ng closing remarks si Sir Roque Quezada, MTTE, upang ipahayag ang pasasalamat sa lahat ng dumalo at naging bahagi ng matagumpay na pagdiriwang.